Propozojmë këto qofte bollgur shumë të shijshme, duke parë se dhe bollguri rekomandohet të përfshihet në menynë ushqimore. Këto janë qofte të veçanta dhe ideale për okazione festash. Me bollgur kemi përgatitur edhe disa recetat të tjera që ju ftojmë ti lexoni nga lidhja ne fund të recetës.
Qofte bollgur
Sasia: 4 persona
Kalori: 170kcal
Përbërësit
- 200 gr bollgur
- 2 kokrra vezë
- 50 gr djathë parmixhan
- 100 gr galet
- 1 kokërr qepë
- 1 thelbi hudhër
- piper
- kripë
- majdanoz
- vaj për skuqje
Përgatitja
- Në fillim në një enë me ujë të nxehtë e kripë, vendosim bollgurin për të zier. Presim të ziej bollguri rreth 7/10 minuta dhe e kullojmë. Bollgurin e kulluar e hedhim në një enë tjetër dhe e lemë lë ftohet.
- Më pas në enë hedhim disa nga përbërësit; vezët, qepën e grirë imët dhe majdanozin të grirë hollë, hudhra e shtypur pasi kemi hequr zemrën, piper dhe kripë.
- I përziejmë të gjithë së bashku derisa masa të jetë homogjene. Nëse masa del e qullët i shtojmë pak miell sa të bëhet një masë e plotë dhe të qëndrojë formë.
- Në hapin tjetër i ndajmë me dorë dhe i japim formën e qofteve duke i kaluar në djathin e grirë. Në fund, qoftet me bollgur i kalojmë në enën me galetë dhe i radhisim për skuqje.
- Vendosim në zjarr tiganin me vaj të bollshëm. Pasi nxehet, skuqim qoftet sa të bëhen kreckë.
- Qofte bollgur janë gati, rekomandojmë të shoqërohen me salcë kosi të përzier me krem djathi.
Ju rekomandojmë edhe këtë ëmbëlsire bollgur me çokollate
