Dollma me lakër është një recete karakteristike e kësaj stine. Lakra është padyshim një perime që duhet të jetë e shtuar në listat tona ushqimore. Në recetën për dollma do të japim një prej gatimeve me lakër por mund të lexoni edhe receten per japrak.
Dollma me lakër të bardhë
Sasia: 6 persona
Kalori: 320kcal
Përbërësit
- 1 kokë lakër mesatare
- 100 gr mish të grirë
- 5 kokrra qepë mesatare
- 100 gr oriz
- salcë domate
- kripë
- piper
- majdanoz
Përgatitja
- Pastrojmë lakrën nga fletët e dëmtuara dhe i presim pjesën fundore. Më pas heqim edhe pjesën e fortë. Ndërkohë që pastrojmë lakrën, në zjarr venë një enë me ujë të bollshëm.
- Pasi të ketë vluar ujë, i hedhim kripën dhe vendosim lakrën të ziejë me fundin poshtë për gati 5-6 minuta. Më pas e heqim lakrën dhe e kullojmë të ngrohtë. I hapim fletët një e nga një në një tavë ose mbi tavolinën e punës.
- Vazhdojmë me përgatitjen e mbushjes për dollma.
- Grijmë qepën hollë, e hedhim në tiganë dhe e kaurdisim pak. Më pas në një enë qelqi hedhim mishin e grirë, orizin, salcën, e domates, kripë, piper, majdanoz si dhe qepën e kaurdisur. E punojmë mirë me dorë derisa të bëhet një masë homogjene.
- Marrim fletët e lakrës dhe i mbushim me anë të një luge me masën e përgatitur. I mbledhim anët dhe i palosim në formë role duke i shtrënguar pak me dorë (nqs gjethja ka akoma kërcellin e fortë, e shtypim me lugë). Vazhdojmë kështu për të gjithë gjethet e lakrës derisa të mbaroj mbushja.
- Dollmat e përgatitura i vendosim në tavë duke i ngjeshur afër njëra tjetrës.
- Që të mos hapen gjatë pjekjes u vihet sipër gjethe lakre të hapura. Pastaj hidhen dy gota uji i nxehtë (rreth 200 mL ujë) nga lakra të përzier me salcë domate.
- Tavën e futim në furrë të nxehur për gati 35-40 minuta, në temperaturën 200 gradë.
- Dollma me lakër shërbehen si pjatë e veçantë e shoqëruar me perime të stinës dhe pse jo djathë dele.
Nëse keni pyetje apo foto mbi recetën mund ti publikoni më poshtë tek forma e komenteve.
Lexoni gjithashtu recetat per pispili me lakra ose lakra turshi.
