Simite për mëngjes (Bukë lepurushi)

Si fillim shkrijmë majanë në pak ujë të vakët. Hedhim miellin në banakun e punës dhe i hedhim pak kripë. I trazojmë pak.Më pas hedhim gjithë përbërësit me radhë. Fillojmë me vezët, i përziejmë ngadalë, pastaj shtojmë sheqerin ose mjaltin, dhe më pas qumështin e vajin. Shtojmë pas kësaj edhe majanë e shkrirë.

Zëmë brumin shpejt, e ngjeshim mirë. E punojmë me kujdes. E vendosim brumin në një enë qelqi dhe e mbulojmë me një pecetë të pastër. E lemë brumin të vijë përreth 1 orë ose derisa të shohim që masa dyfishohet. Më pas e marrim brumin dhe e bëjmë në formë roleje. E ndajmë në 20 pjesë. Çdo pjesë e bëjmë në formë roleje, si formë kërmilli dhe i vendosim në një tepsi ku kemi vendosur letër furri.

Pasi i kemi vendosur të gjitha pjesët mbulojmë tepsinë dhe e lemë që të vijë përreth 15 minuta. Më pas në një enë rrahim të verdhën e vezës me pak qumësht dhe i lyejmë sipër simitet me furçë. Vendosim tepsinë në furrë të nxehtë 180°C dhe i pjekim përreth 25-30 minuta, ose derisa të shohim që simitet sipër kanë marrë një ngjyrë të bukur të kuqërremtë.

Pasi kemi fikur furrën i lemë akoma në të përreth 10-15 minuta. Më pas i nxjerrim i lemë të ftohen pak dhe i ndajmë. I shërbejmë simitet të ngrohta, të shoqëruara me pak reçel ose i shijojmë ashtu siç janë.